حظك اليوم برج الميزان الاثنين 9/4/2018 ..محتاج ترقص على انغام اغاني التكاتك

حظك اليوم برج الميزان الاثنين 9/4/2018

اعرف حظك اليوم برج الميزان بالتفصيل الاثنين 9/4/2018 مع عبدالله أحمد برج الميزان عاطفيا( الكراش والإكس والبوي فريند والجيرل فريند والجوز والزوجة والقرايب ):

اطلع من مود الشحتفة دة وفوق كدة واكبر.. تعاطف الناس مش هيفيدك بشكل حقيقي ف اي حاجة.. اكبر كدة واقف جنب نفسك وبس وبلاش كلام فاضي

برج الميزان عمليا( الشغل والمذاكرة والتخطيط لبكرة ):

شياكتك النهاردة هتبقى حاجة مهمة جدا سواء ف اللبس المظهري او ف الكلام المعنوي.. كل ماكان كلامك مرتب ومنمق وبيعبر عنك ببساطة وعن قدراتك الحقيقية - مش فكرتك الخيالية عن قدارتك - كل ماكان وضعك العملي بيتحسن ف وسط الالمجتمع والنظام الرأسمالي الجشع.. خد بالك بس ومتجيش على نفسك عشان حد ميستاهلش.. متعملش شغل حد لمجرد انك عاوز تبان جدع.. بلاش هبل بقى.. بلاش

برج الميزان صحيا( نفسيا وجسمانيا وكل مايخص طاسة المزاج ):

صحيا انتا محتاج ترقص مع نفسك كدة على انغام اي اغاني شعبية من بتاعة التكاتك كدة.. دي الحاجة الوحيدة اللي ممكن تفرفشك بشكل حقيقي النهاردة والفرفشة مطلوبة جدا عشان تحسن من نفسيتك وبالتالي تحسن من مناعتك اللي هتحتاجها اليومين اللي جايين دول لما يخش عليك دور البرد اللي ميكروبه كامن دلوقتي ومستخبي ف طرطوفة مناخيرك..

إعرف توافق برج الميزان مع باقي الأبراج النهاردة:

متوافق مع الابراج البرطمانية والكستبانية والبرمائية والنارية والهوائية والمائية..

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.