عمرو أديب: الأيام الجاية صعبة على الجميع.. ومش عارف ليه الأسعار بتزيد في مصر بالصورة الكبيرة دي

علق الإعلامي عمرو أديب، على زيادة أسعار طبق البيض في الأسواق ووصوله إلى 80 جنيهًا في بعض المناطق.

عمرو أديب قال خلال برنامج الحكاية مساء اليوم الاثنين: ليه أسعار البيض مرتفعة؟.. فيه حد له مصلحة عشان يرتفع بالشكل ده.. أسعار السماد والقمح نزلت الأسعار لسه في الزيادة، فيه حد من مصلحته يزق في البيض عايزه يزيد لسبب أو لآخر، ويقول أنت مش شايف الحرب الأوكرانية؟.

زيادات غير طبيعية في مصر

وأضاف الإعلامي عمرو أديب: فيه زيادات غير طبيعية في مصر، الأسعار استقرت في بعض الدول، شيء غير طبيعي بيجرى يا جماعة، وكله كوم والحاجات المستوردة كوم تاني أرقام مذهلة قفزات رهيبة، التضخم نسبته كام؟، ليه الأسعار زايدة بالشكل الرهيب دا.

الشهور القادمة صعبة على الجميع

وأكمل الإعلامي عمرو أديب عبر برنامج الحكاية: بحب أقول للناس من هنا لآخر السنة والكلام اللي بقوله محسوب عليا، الشهور الجاية أصعب شهور من أول الأزمة على الدولة وعلى الفرد، وعليهما أن يدبرا مصاريف لهما، واللي بقوله معروف لي ولناس كتير والعالم فاهم دا كويس.

وتابع الإعلامي عمرو أديب: الأيام الجاية للأسف صعب جدًا على المواطن والوضع مش سهل، والإدارة في مصر بتحب تطمئن الشعب على الفترة الصعبة دي.