بلاي ليست.. بوكيه ورد بلدي أزرق.. لمحبي الرقة والاحساس فقط

بلاي ليست.. بوكيه ورد بلدي أزرق.. لمحبي الرقة والاحساس فقط

الورد البلدي الازرق ورد مميز جدا ورقيق وغالي مش رخيص.. رغم انه مفيش ورد طبيعي بلدي لونه ازرق الا انه بيمثل الرقة كلها والجمال كله بالنسبة لناس معينة..

كُل اللي يعجبك وإلبس اللي يعجبك وإسمع المزيكا اللي تعجبك وإتفرج على اللي يعجبك وإشتغل او متشتغلش.. اللي يعجبك.. وإمشي بالخطوة اللي تعجبك وإحزن أو إفرح بالشكل اللي يعجبك.. وإتكلم بالطريقة اللي تعجبك وإتغير التغيير اللي يعجبك وإكبر أو إصغر أو إتجنن بالفكرة اللي تعجبك.. وعيش بالطريقة اللي تعجبك وحب اللي يعجبك وإتمنى تموت بالطريقة اللي تعجبك.. مش مهم ولا ضروري تعجب حد إلا اللي يعجبك.. ويحبك.. المهم تحب اللي يعجبك.. لأنه ف الاخر لا الحياة ولا الناس هتعمل فيك أو بيك اي حاجة تعجبك.

المزيكا لغة التواصل بين الارواح وبعضها باستخدام اصوات جميلة لوحدها او مع كلام ومعاني.. مصداقيتها بسيطة وسلسة وجميلة.. فيها المعنى وفيها الاحساس وفيها الهارموني وفيها اللحن اللي علق ف دماغك باليوم والشهر والسنة.. تقدر تسمعها لوحدك او ف وسط ناس او مع ناس او مع حيوانات.. مش هتفرق.. الفرق كله يكمن ف قدرتك على الاحساس والفهم والاستيعاب.. المزيكا ممكن تعالج اكتئابك ومرضك النفسي بدون جلسات.. بدون اعترافات وفضفضة وتقليب ف ذكريات بغيضة..المزيكا ممكن تكون وسيلتك للتواصل مع الحياة.. المزيكا صوت الحياة.