حظك اليوم مع عبدالله أحمد الثلاثاء 12/6/2018 فرفشة وزقططة لكل الأبراج

حظك اليوم مع عبدالله أحمد الثلاثاء 12/6/2018 فرفشة وزقططة لكل الأبراج

إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة وم ينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة.

عشان تعرف حظك بشكل كامل .. صفي نيتك ودوس على صورة برجك بإيدك اليمين.

اعرف حظك اليوم برج الحمل بالتفصيل الثلاثاء 12/6/2018 مع عبدالله أحمد

حظك اليوم برج الحمل عاطفيا

( الكراش والإكس والبوي فريند والجيرل فريند والجوز والزوجة والقرايب ):

إتشعبط ف الفرحة النهاردة وبلاش لوي بوز ولا عكننة ع الفاضي.. المسألة مش مستاهلة ولا فاضل ف العمر وقت يضيع ف مين قال ايه ومين عمل ايه.. كبر دماغك وشوف مصلحتك وانبسط وبس..

حظك اليوم برج الحمل عمليا

( الشغل والمذاكرة والتخطيط لبكرة ):

إتشعبط ف الفرحة النهاردة بكل قوتك وبأي وسيلة متاحة.. اليوم مناسب وأي وقت هتختاره عشان تفرح فيه هيبقى مناسب برضة لو ايقنت من جواك ان من حقك تبقى مبسوط وسعيد ف حياتك.. خد القرار دة بس وسيبها على الله وكل حاجة هتمشي مظبوط وزي الفل.. وي هوب سو يابرنس.. وي هوب سو..

حظك اليوم برج الحمل صحياً

( نفسيا وجسمانيا وكل مايخص طاسة المزاج ):

صحتك بتيجي على المزيكا اللي بتحبها زي عينيك.. اظن انتا عارف هتعمل ايه كويس ف الموضوع دة ومش محتاج لا نصايح ولا وصاية ولا حد يقولك تعمل ايه بالظبط.. معروف لما المزيكا بتشتغل الانسان علاطول بيسقف ويضحك ويرقص حتى وهو قاعد ف مكانه.. معروفة يعني.. غذائيا انتا محتاج سندوتش كشري وازازة سوبيا لوحدك وانتا تبقى زي الفل ومزاجك عال العال..

إعرف توافق برج الحمل مع باقي الأبراج :

متوافق مع الابراج المعدنية والنارية والبرنسية واحيانا المائية والبرمائية والترابية.

اعرف حظك اليوم برج الثور بالتفصيل الثلاثاء 12/6/2018 مع عبدالله أحمد

حظك اليوم برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

إركن العند على جنب وخد بالك عشان اليوم مليان ألف فرصة وفرصة عشان تقتل النكد كما لو كان عِرسة.. أما نشوف هتعمل ايه بقى.

حظك اليوم برج الثور عمليا

( الشغل والمذاكرة والتخطيط لبكرة ):

خد بالك يامعلم عشان في عكوسات كتير النهاردة طايرة ف الهوا وبتزحف فوق الارض وتحتها وممكن جدا لو عاندت او تعمدت تخترع نكد جديد تتكدر وبشكل أكيد.. افرح احسن وببساطة ولو كان الفرح صغنتت وميعديش من خرم ابرة الخياطة..

حظك اليوم برج الثور صحياً

( نفسيا وجسمانيا وكل مايخص طاسة المزاج ):

صحيا النهاردة انتا محتاج شوية تمرينات رياضية عشان تفك عضلاتك وتحس بالنشاط وتهرب من الكسل.. ولو مكسل ومفكش حيل تعمل اي تمرينات ف مش لازم تقوم وتجري بحصانك واكتفي بالرقص وانتا قاعد ف مكانك.. عادي يعني اهي كلها حركة وخلاص.. غذائيا حاول تركز النهاردة ف الطيور والاسماك اكتر من النباتات

إعرف توافق برج الثور مع باقي الأبراج :

متوافق مع الابراج الكتكوتية والمائية والحلولية والنارية والمائية والترابية.

اعرف حظك اليوم برج الجوزاء بالتفصيل الثلاثاء 12/6/2018 مع عبدالله أحمد

حظك اليوم برج الجوزاء عاطفيا

( الكراش والإكس والبوي فريند والجيرل فريند والجوز والزوجة والقرايب ):

جميل النهاردة وأمور جمال بمقطورة وممكن يخلي اي حد مبيحبكش يحس انه شبه الحنكورة وأحيانا أبو شفطورة.

حظك اليوم برج الجوزاء عملياً

( الشغل والمذاكرة والتخطيط لبكرة ):

عمليا النهاردة انتا محتاج تعمل بارتي انتا وحبايبك وتحتفلوا ف المطلق وبدون ابداء اي اسباب لأي حد.. كفاية انك عاوز تفرح وبس.. دة مبرر كافي على فكرة

حظك اليوم برج الجوزاء صحياً

( نفسيا وجسمانيا وكل مايخص طاسة المزاج ):

صحيا خد بالك حبة انك محتاج ترقص وتزقطط وتنبسط بنفسك وبجمالك وبصحتك وبحسك ف الدنيا.. غذائيا اليوم مناسب للأيس كريم ولتورتة الايس كريم جدا..

إعرف توافق برج الجوزاء مع باقي الأبراج :

متوافق مع الابراج الحرنكشية والمائية والهوائية.

اعرف حظك اليوم برج السرطان بالتفصيل الثلاثاء 12/6/2018 مع عبدالله أحمد

حظك اليوم برج السرطان عاطفياً

( الكراش والإكس والبوي فريند والجيرل فريند والجوز والزوجة والقرايب ):

مود حساس وقد تشعر ببعض الحيرة والإلتباس.. بس كل دة هيختفي لو طلعت على قمة تل او جبل وصرخت ف العالم وقولت “ ياللا ياكوكب أزرق ف أخضر ومفيهوش إحساس”.

حظك اليوم برج السرطان عملياً

( الشغل والمذاكرة والتخطيط لبكرة ):

من حقك النهاردة تسمع كلام حلو عن نفسك من حد بيحبك.. دة ممكن يكون اهم حاجة عملية تعملها النهاردة ف حياتك العملية اساسا خصوصا وانك اهم من اي حاجة بتعملها ونفسيتك اهم من اي حاجة مهمة بالنسبة لأي حد..

حظك اليوم برج السرطان صحياً

( نفسيا وجسمانيا وكل مايخص طاسة المزاج ):

صحيا انتا النهاردة من حقك تزقطط نفسك حبة وتخش سينما بالليل وياحبذا لو في حد حلو ف حياتك لدرجة انه يعزمك على اي حاجة حلوة او على اكلة حلوة كدة من نقاوتك وعلى مزاجك..

إعرف توافق برج السرطان مع باقي الأبراج :

متوافق مع الابراج البلاستيكية والحديدية والبرمائية.

اعرف حظك اليوم برج الأسد بالتفصيل الثلاثاء 12/6/2018 مع عبدالله أحمد

حظك اليوم برج الأسد عاطفيا

( الكراش والإكس والبوي فريند والجيرل فريند والجوز والزوجة والقرايب ):

إبحث عن الفرحة بمنكاش وتجنب الفرهدة والطناش.. كما يجب عليك إتباع الأثر والأخد بالعظات وإستخلاص العبر وخصوصا في لحظات إكتمال وجه القمر.. ياقمر انتا ياقمر.. كلام جامد عليا النعمة للي يفهمه ويقدره.

حظك اليوم برج الأسد عملياً

( الشغل والمذاكرة والتخطيط لبكرة ):

هتراودك النهاردة احلام يقظة كتير عن الكحك والسكوت بتاع العيد وهتحلم وانتا صاحي انك بتسقي الكحك دة ف الشاي.. حقك الصراحة.. انتا تسقي ف خيالك براحتك اساسا ولا حد له عندك حاجة

حظك اليوم برج الأسد صحياً

( نفسيا وجسمانيا وكل مايخص طاسة المزاج ):

صحيا انتا زي الفل.. راعي بس انك مهم النهاردة تخرج بالليل تتفسح ف اي حتة وتنبسط.. غذائيا ركز ف المقلوبة والمسقعة والبامية..

تعرف على توافق برج الأسد مع باقي الأبراج النهاردة:

متوافق مع الابراج البسبوسية والحلبسية والمائية والترابية والكتكوتية.

اعرف حظك اليوم برج العذراء بالتفصيل الثلاثاء 12/6/2018 مع عبدالله أحمد

حظك اليوم برج العذراء عاطفيا

( الكراش والإكس والبوي فريند والجيرل فريند والجوز والزوجة والقرايب ):

النهاردة ممكن تشوف الفرحة معدية من قدامك واحتمال تخبط على بابك.. انصبلها كمين واقفلها ورا الباب واول ما تخبط تاني خبطة افتح فجأة وشنكلها وكلها نص برجل واحدة مرة واحدة واحبسها عندك بقى اسبوع كدة ولا حاجة.. طبعا انتا شايف دة كله كلام تافه دلوقتي.. صح؟.. عموما الله يسامحك ياعم.

حظك اليوم برج العذراء عملياً

( الشغل والمذاكرة والتخطيط لبكرة ):

عمليا انتا النهاردة قدامك تفرح وقدامك متفرحش.. الذكاء بيقول انك تختار تفرح مهما كان العالم من حواليك مكشر او مش عارف ينبسط.. ثم تزعل ليه اساسا وعشان ايه.. الكوكب دة كله اساسا زلطة تايهة ف الفضا وممكن ف اي لحظة يظهر كائن فضائي ضخم جدا يشوفها كورة ويروح شايطها برة المجرة.. افرح وزقطط ومتشغلش بالك بأي حاجة.. مفيش حاجة مستاهلة الزعل.. دي مجرد ايام وبنعديها.. مش أكتر والله..

حظك اليوم برج العذراء صحياً

( نفسيا وجسمانيا وكل مايخص طاسة المزاج ):

صحيا انتا محتاج دش بارد لطيف وبعده تطلع كدة تسترخي ف السرير وتحس انك ملك زمانك.. مهم تبعد النهاردة عن اي حاجة او اي حد بيزعلك او مبيحبش يشوفك مبسوط او قطقوط.. غذائيا تقدر تركز النهاردة ف المحاشي والطواجن براحتك.. خف ف الحلويات بس حبة وبلاش سكر كتير كفاية انتا موجود ف الحياة..

إعرف توافق برج العذراء مع باقي الأبراج النهاردة:

متوافق مع الابراج الشرشوبية والزغلولية والعسلية والهوائية والترابية والبرمائية.

اعرف حظك اليوم برج الميزان بالتفصيل الثلاثاء 12/6/2018 مع عبدالله أحمد

حظك اليوم برج الميزان عاطفيا

( الكراش والإكس والبوي فريند والجيرل فريند والجوز والزوجة والقرايب ):

إبعد عن الماضي الأليم وفكر إزاي تحتفل بنفسك وبجمالك وبحضورك ف الحياة.. ثم زعلان ازاي وحسك لسة منور الدنيا وماليها.. افرح وفكك من اي أحزان شبه الكوسة او القلقاس او البتنجان.

حظك اليوم برج الميزان عمليا

( الشغل والمذاكرة والتخطيط لبكرة ):

اليوم مناسب للفرحة مش للنكد ابدا النهاردة.. وخصوصا بالنسبالك.. محتاج بس تركز ف انك متسرحش ورا اي افكار سلبية معدية او خناقة مستحية.. عاند وافرح بكل قوتك وف نفس الوقت خليك طيب وحنين كدة على اي حد بيحاول يبسطك او يساعدك تبقى افضل.. وبكدة تبقى طبقت قاعدة بكاسة وحنان ضد كل الأحزان صح الصح.. اتمنالك تنبسط..

حظك اليوم برج الميزان صحيا

( نفسيا وجسمانيا وكل مايخص طاسة المزاج ):

صحيا انتا كويس بس ممكن يكون في قلق مادي ما عاملك هسس عابر.. عموما متقلقش.. الفلوس مبتشتريش فرحة والانبساط لسة ببلاش وف الامكان رغم اي احزان.. خد بالك بس من شعرك النهاردة وركز ف الهدوم ذات الالوان المفرحة بحيث تبقى خارج من البيت وانتا واضح عليك وبتعلن للعالم انك النهاردة هتنبسط رغم كل شيئ بايجابية رغم كل الحاجات السلبية.. غذائيا ركز ف الشاورمة والبطاطس المحمرة والتومية والكاتشب..

إعرف توافق برج الميزان مع باقي الأبراج النهاردة:

متوافق مع الابراج الحسواكية والسوبيائية.

اعرف حظك اليوم برج العقرب بالتفصيل الثلاثاء 12/6/2018 مع عبدالله أحمد

حظك اليوم برج العقرب عاطفيا

( الكراش والإكس والبوي فريند والجيرل فريند والجوز والزوجة والقرايب ):

يوم حلو ومشاعر فتاكة وكتكاتة بدرجة تلاتة من تلاتة على مقياس الحمادة.. إبعد بس عن أي تفكير ف الماضي المرير وركز ف التفاح الأخضر والأناناس بتاع الفرافير وعصير اللمون البنزهير.

حظك اليوم برج العقرب عملياً

( الشغل والمذاكرة والتخطيط لبكرة ):

عمليا اليوم قطقوط ف نفسه رغم الحر ورغم الرطوبة ورغم العكوسات ومش مناسب لأي ملامة أو مشاعر هدامة ولا تفكير ف ذكريات فات عليها سنين ياما.. ركز وانبسط واضحك بصوت عالي ورازي ف النكد وصفي النية وهاتله سكتة قلبية..

حظك اليوم برج العقرب صحياً

( نفسيا وجسمانيا وكل مايخص طاسة المزاج ):

صحيا انتا محتاج مساج ودلع وحد يعملك عصير ويحكيلك حكاية قبل النوم تكون فيها انتا الامير وحواليك وحوش كتير.. هتقتلهم وتنقذ الاميرة وتبقى بطل ف نظر الناس وف نظر نفسك لفترة طويلة ان شاء الله.. غذائيا ركز النهاردة ف السمبوسك وف الرقاق وف طاجن الرز المعمر ان وجد..

إعرف توافق برج العقرب مع باقي الأبراج النهاردة:

متوافق مع الابراج المائية والهوائية والزغلولية والحبشتكانية والحمصية والسمسمية والحللولية والبربوشية.

اعرف حظك اليوم برج القوس بالتفصيل الثلاثاء 12/6/2018 مع عبدالله أحمد

حظك اليوم برج القوس عاطفياً

( الكراش والإكس والبوي فريند والجيرل فريند والجوز والزوجة والقرايب ):

اليوم فرفوش جدا وخصوصا بالليل ومناسب جدا لسماع الاغاني والفرجة على الافلام القديمة ومش مناسب ابدا للخناق سواء مع نفسك او مع اي حد.. الهدوء والاستقرار النفسي افضل واظرف وافيد النهاردة.. طبعا الكلام دة ينفع ويتطبق وينجح لو انتا من جواك عاوز تنبسط.. اما لو مش حابب ف من حقك طبعا تقضي الوقت نوم واحلام يقظة..

حظك اليوم برج القوس عملياً

( الشغل والمذاكرة والتخطيط لبكرة ):

محتاج تسمع اغاني فيها صوت اكورديون كتير جدا.. ف الاغلب ممكن تكون أغاني فلكلورية من امريكا اللاتينية مثلا ولا حاجة.. اهم حاجة تركن نرجسيتك الاول وبعد كدة ابقى شغل المزيكا عشان النرجسية ممكن تقف ف طريق استمتاعك بالمزيكا وبحاجات كتير جدا.. بس انتا مبتاخدش بالك..

حظك اليوم برج القوس صحياً

( نفسيا وجسمانيا وكل مايخص طاسة المزاج ):

صحيا في شوية ميكروبات محتاجة تتدلع النهاردة بحماية عنب كدة.. غذائيا تقدر تعمل حفلة مكرونة بصلصة وبانيه براحتك من الفطار للسحور وفكك من الدايت خالص دلوقتي.. اهم حاجة تنبسط وبعدين نبقى نشوف حكاية الكالوريز الزيادة دي متقلقش منها خالص مالص..

إعرف توافق برج القوس مع باقي الأبراج النهاردة:

متوافق مع الابراج الزلومية والحنكوشية والبرميلية والنارية والترابية.

اعرف حظك اليوم برج الجدي بالتفصيل الثلاثاء 12/6/2018 مع عبدالله أحمد

حظك اليوم برج الجدي عاطفياً

( الكراش والإكس والبوي فريند والجيرل فريند والجوز والزوجة والقرايب ):

حاول تبتسم من اول اليوم من اول ماتصحى كدة ف وش الناس والحياة بشكل عام.. افرض على العالم النهاردة الانبساط والزقططة خصوصا وانه لما بينكد عليك مبيستأذنش ولا بياخد رأيك الأول ولا بيشوف اذا كنت انتا جاهز ومستعد للنكد دة ولا لأا.. بالتالي من حقك لما تحب تفرح تفرض الفرحة دي على العالم من حواليك.. وطبعا اول ناس المفروض تفرح معاك هما الناس اللي انتا بتحبهم.. ودة حقهم يا سيد.. حقهم.

حظك اليوم برج الجدي عملياً

( الشغل والمذاكرة والتخطيط لبكرة ):

خد بالك عشان احتمال كبير يجيلك زيارة مخصوصة من كوكب تاني.. غالبا في فضائيين هينزلوا على سطح البيت عشان يحتفلوا معاك حبة النهاردة ويفرفشوك.. حاول تجهز من بدري بفشار كتير وعصير وياحبذا لو تقفلهم ع السطح بالليل ماسك كشاف بينور ويطفي عشان يعرفوا يركنوا بشكل سليم وميقعوش ف المنور..

حظك اليوم برج الجدي صحياً

( نفسيا وجسمانيا وكل مايخص طاسة المزاج ):

صحيا انتا محتاج تركن اي نكد او مشاكل مش لاقيلها حل واضح على جنب وترقص وتفرفش وتتنطط براحتك.. اليوم مناسب لأي نشاط مجنون وقد يكون ميمون.. غذائيا ركز ف الاكل الخفيف طالما ناوي ترقص وتتنطط بقى والا بطنك هتوجعك وهتتعب بسرعة..

إعرف توافق برج الجدي مع باقي الأبراج النهاردة

متوافق مع الابراج الهوائية والترابية والفسفورية والكتكوتية والعدوانية والحلزونية.

اعرف حظك اليوم برج الدلو بالتفصيل الثلاثاء 12/6/2018 مع عبدالله أحمد

حظك اليوم برج الدلو عاطفياً

( الكراش والإكس والبوي فريند والجيرل فريند والجوز والزوجة والقرايب ):

قد يظنون بك الظنون ولكنك تمتلك ذكاءا يفوق ذكاء الحيزبون وتقدر تحط اي حد ف الفريندزون.. ولكن حذاري من ان تلتزم بوعودا ومن ورائها تكون يدوبك بتسنجف الزبون.. ف من يفعل ذلك في توقيت النجاح يحتسب في عرف المنطق والحياة مجنونا مجنونا مجنون.

حظك اليوم برج الدلو عملياً

( الشغل والمذاكرة والتخطيط لبكرة ):

اليوم جميل وفرفوش جدا لكل الابراج وانتا طبعا سيد مين يحب الفرفشة والدلع والهشتكة.. تقدر تفرفش دايما النهاردة بواسطة كل حاجة بتعملها.. مش لازم تاخد اليوم اجازة او تكسل تشتغل وتخلص اللي وراك.. بالعكس.. تقدر دايما انتا دونا عن اي حد تستمتع وللأخر بكل حاجة بتعملها بطريقتك وبدماغك وبتفردك وشطارتك.. استمتع لأنك تستاهل دة وجدا على فكرة..

حظك اليوم برج الدلو صحياً

( نفسيا وجسمانيا وكل مايخص طاسة المزاج ):

صحيا حتى لو في تعب تقدر تعانده وتديله بالروصية ف سنانه وتقوم وتنبسط.. الاكتئاب دة على نفسه يابيه.. على نفسه والله ولا يعرف يعمل معاك حاجة اساسا.. غذائيا ركز ف الملوخية وف الفراخ وف الرز البسمتي او الابيض بشعرية.. اياك ثم ف اياك تدوس ف رز ابيض بلا شعرية.. مش مقامك ياغالي والله..

إعرف توافق برج الدلو مع باقي الأبراج النهاردة:

متوافق مع الابراج الفسيفسائية والنارية والخيالية والفرفورية والشكمجية والهوائية والنارية.

اعرف حظك اليوم برج الحوت بالتفصيل الثلاثاء 12/6/2018 مع عبدالله أحمد

حظك اليوم برج الحوت عاطفيا

( الكراش والإكس والبوي فريند والجيرل فريند والجوز والزوجة والقرايب ):

عاطفيا اليوم جميل وفرفوش ومينفعش تبقى فيه مكشر ولا قفوش.. انكش شعرك على العالم وانبسط براحتك النهاردة.. اليوم مناسب للحب بشكل رائع.. صفي نيتك بس واتشجع ومتخافش وكل حاجة هتمشي زي السكينة ف الحلاوة..

حظك اليوم برج الحوت عملياً

( الشغل والمذاكرة والتخطيط لبكرة ):

شياكة فتاكة ومشاعر طاقتها تفوق طاقة ألف ناقة.. من حقك النهاردة تحتفل بالحياة براحة راحتك.. إفتكر دايما انك طيب وحنين وجميل والعالم المفروض يشكرك على التواجد فيه وعلى انك بتديله شرف انك يدوبك بس بتشارك ف الحضارة الانسانية من وقت للتاني بإضافات جذابة ومثمرة.. قشطة عليك ومن حواليك دائما وأبدا.

حظك اليوم برج الحوت صحياً

( نفسيا وجسمانيا وكل مايخص طاسة المزاج ):

صحيا كل ما هتبص لكل حاجة حواليك بشكل ايجابي النهاردة هتنبسط وهتاخد بالك من تفاصيل جديدة تبسطك اكتر.. غذائيا تقدر تخش ف صينية مكرونة بالبشاميل او ف اكلة سمك بقلب جامد.. استمتع..

إعرف توافق برج الحوت مع باقي الأبراج النهاردة:

متوافق مع الابراج الفسفورية والمائية والخشبية والحبهانية والعفريتية والنارية.

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.