حظك اليوم مع عبدالله أحمد الثلاثاء 10/4/2018.. طوب وزلط للثور وجبنة مقلية للعذراء

حظك اليوم مع عبدالله أحمد الثلاثاء 10/4/2018.. طوب وزلط للثور وجبنة مقلية للعذراء

إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة.

كلام جد:

اللي لونه ازرق اكيد قلبه بحر..اكيد افكاره بحر..اكيد كلامه موج.. اكيد مش ثابت مهما بان هادي..اكيد اكيد..معندوش حاجة اكيد.

عشان تعرف حظك بشكل كامل .. صفي نيتك ودوس على صورة برجك بإيدك اليمين.

اعرف حظك اليوم برج الحمل بالتفصيل الثلاثاء 10/4/2018 مع عبدالله أحمدبرج الحمل عاطفيا( الكراش والإكس والبوي فريند والجيرل فريند والجوز والزوجة والقرايب ):

بلا حب بلا بتاع ياجدع هو انتا فاضي للكلام دة برضة.. بلا قلبة دماغ على الفاضي.. شوفلك بيتزا كُلها ولا جوفاية عضعض فيها احسن وبلاش بكاء على الشيكولاتة المسكوبة.. قال حب قال..

برج الحمل عملياً( الشغل والمذاكرة والتخطيط لبكرة ):

دماغك مش فيك خالص اليومين دول ومش مركز وحاسس بتشتيت كبير وبدأت تُتهم بالإهمال..شوفلك أجازة او نام كويس او بطل تشغل دماغك بالرد على كل كلمة بتتقالك.. وبسرعة.

برج الحمل صحياً( نفسيا وجسمانيا وكل مايخص طاسة المزاج ): صحتك محتاجة منك تهتم حبة بضهرك وبالانيميا لو عندك انيميا.. مش انك تفكر ازاي هتاكل فسيخ ورنجة على قد ماتقدر كانك اول مرة تشوفهم..

إعرف توافق برج الحمل مع باقي الأبراج النهاردة:

متوافق مع الابراج البسبوسية واللولبية والفهلوية والكتكوتية والمستحية والترابية والمائية والهوائية.

اعرف حظك اليوم برج الثور بالتفصيل الثلاثاء 10/4/2018 مع عبدالله أحمد

برج الثور عاطفياً( الكراش والإكس والبوي فريند والجيرل فريند والجوز والزوجة والقرايب ):متقلقش.. كل حاجة هتبقى كويسة قريب لو اتصرفت صح ولو بطلت تحدف طوب وزلط ف كلامك ف وش اللي بتحبه.. غير كدة والنبي لو قعدت من هنا لسنة قدام محدش لا هيعبرك ولا هيصالحك ولا هيهتم اساسا.. لما تحب حد حضرتك مهم جدا تبينله دة وتعامله معاملة تليق بحبك ليه.. مش تعتبره اتركن على رف ممكن تستدعيه وقت الحاجة وبس.. كدة انانية مش حب يابرنس.. انانية ملهاش عذر بصراحة..

برج الثور عمليا( الشغل والمذاكرة والتخطيط لبكرة ):

إبتسامتك النهاردة هتوفر عليك هري كتير جدا وشرح مالوش لازمة ووجع دماغ مفرط.. استخدمها بحرص وف محلها وكبر دماغك ومتفكرش كتير ف مشاكلك.. اللي هيريده ربنا هو اللي هيكون وبس.

برج الثور صحياً( نفسيا وجسمانيا وكل مايخص طاسة المزاج ):صحتك زي الفل بس الصداع مضايقك ف الاغلب ودة ناتج من نواتج كتر التفكير وقلة النوم والصراعات والحروب اللي انتا داخلها اليومين دول سواء بمزاجك او مفروضة عليك بشكل ظالم وضال ومقحم ف صرصور ودن حياتك .. لهمس اللي بقيت تسمعه ف ودانك وانتا قاعد لوحدك كأن حد خفي بيكلمك.. الهسس دة بيحصلك وبتحس بيه من كتر الضغط اللي عليك.. واللي المفروض تشوفله حل سريع وحاسم قريب لمصلحتك..

إعرف توافق برج الثور مع باقي الأبراج النهاردة:

متوافق مع الابراج الكستبانية والدخانية والمونوكرومية والكتكوتية والبرمائية والهوائية والنارية والترابية..

اعرف حظك اليوم برج الجوزاء بالتفصيل الثلاثاء 10/4/2018 مع عبدالله أحمد برج الجوزاء عاطفيا( الكراش والإكس والبوي فريند والجيرل فريند والجوز والزوجة والقرايب ):بتاخد قرار وترجع فيه كل خمس دقايق ومش عارف تتعامل مع دماغك وقلبك اللي متفقين عليك وبيرازوك طول الوقت ف مشاعرك وأحاسيسك ومش مخلينك عارف تحتفظ بحب حد بشكل مستقر مستمر وليس مكفهر.. الحل بسيط حضرتك.. ثق شوية ف اللي بتحبه يا إما تختار بوضوح وصراحة انك متحبوش.. بسيطة خالص اهي

برج الجوزاء عملياً( الشغل والمذاكرة والتخطيط لبكرة ):

في حد هينصحك النهاردة نصيحة ممكن تبان بايخة ف ظاهرها وملهاش محل من الاعراب عندك.. بس لو دققت وركزت وفكرت حبة هتلاقيها ف مصلحتك جدا.

برج الجوزاء صحياً( نفسيا وجسمانيا وكل مايخص طاسة المزاج ): لو عجبك الكنتالوب بتاع امبارح انصحك بتكرار الجرعة لحد ما تحس انك خلاص.. عملت دماغ من كتر الكنتالوب اللي بيجري ف دمك.. تجنب الفسيخ والملوحة وركز مع الرنجة حبة لو ليك مزاج ف الحاجات ام ريحة دي..

إعرف توافق برج الجوزاء مع باقي الأبراج النهاردة: متوافق مع الابراج البربئية والمونوكرومية والحنتوسية والحلبسية والكشرية والبرمائية والنارية والهوائية..

اعرف حظك اليوم برج السرطان بالتفصيل الثلاثاء 10/4/2018 مع عبدالله أحمد

برج السرطان عاطفياً( الكراش والإكس والبوي فريند والجيرل فريند والجوز والزوجة والقرايب ):انتا تبحث عن الحب وبتقول انك مش مهتم.. طب ازاي يعني؟.. والمفروض الحياة والناس اللي عايشة وتعتبر زمايلك فيها دول يعملوا ايه بالظبط مش فاهم؟.. يشوفولك حد تحبه بالليل بس مثلا وبالنهار يختفي ولا ايه نظامك بالظبط..

برج السرطان عملياً( الشغل والمذاكرة والتخطيط لبكرة ): إبعد عن الدخان النهاردة حبة وريح صدرك شوية يامعلم.. كمان ياريت متفكرش قبل ماتنام ف اللي حصل طول اليوم.

برج السرطان صحياً( نفسيا وجسمانيا وكل مايخص طاسة المزاج ): خد بالك من صدرك اليومين دول عشان التراب ف الجو للركب وكمان الناس بقت بتعطس خلاص ف وش بعض عادي مبيتكسفوش.. واضح انهم خلعوا برقع الحيا الصحي باين ولا حاجة..

إعرف توافق برج السرطان مع باقي الأبراج النهاردة: متوافق مع الابراج الفركتوزية والحبشتكانية والحنجورية والترابية والنارية والمائية..

اعرف حظك اليوم برج الأسد بالتفصيل الثلاثاء 10/4/2018 مع عبدالله أحمد

برج الأسد عاطفيا( الكراش والإكس والبوي فريند والجيرل فريند والجوز والزوجة والقرايب ):

الحب مبيفهمش التعالي او الكبر.. بياخد بعضه وبيعدي من قدامك من غير مايسلم اساسا.. وبصراحة هو معاه حق.. انتا مبتسلمش على حد الا لو هو اللي جالك يسلم عليك.. قال ايه مش مركز ومشغول.. لا والله!.. طب خليك مشغول بقى براحتك ومع نفسك.. ولوحدك..

برج الأسد عملياً( الشغل والمذاكرة والتخطيط لبكرة ):

حاول تفصل دماغك حبة النهاردة وبلاش تفكير وتمحيص وتدقيق ف كل التفاصيل الممكنة اللي ورا كل حاجة.. إدي دماغك أجازة حبة ياكابتن عشان تعبت منك.

برج الأسد صحياً( نفسيا وجسمانيا وكل مايخص طاسة المزاج ): إهتم حبة بعينيك بدل ما تضطر تلبس نضارة كعب كوباية وتبقى كل مشاكلك انك شايف البعيد كويس والقريب طشاش وصباع رجلك الصغير يأنتم بقى مع قاعدة التلاجة وسن حرف الكومدينو وتتخبط ف الراحة والجاية عمال على بطال.. إهتم حبة بعينيك لو سمحت..

تعرف على توافق برج الأسد مع باقي الأبراج النهاردة: متوافق مع الابراج الحنكوشية والكهربائية والبرطمانية والكهرمانية والنرفانية والمائية والبرمائية..

اعرف حظك اليوم برج العذراء بالتفصيل الثلاثاء 10/4/2018 مع عبدالله أحمد

برج العذراء عاطفيا( الكراش والإكس والبوي فريند والجيرل فريند والجوز والزوجة والقرايب ):

الاصول بتقول ان الواحد طالما مش عارف يدلع قلبه يبقى مقداموش غير انه يدلع معدته.. راجع ف الجز الخاص بالصحة هتعمل ايه بالظبط ف الموضوع دة..

برج العذراء عملياً( الشغل والمذاكرة والتخطيط لبكرة ): قدامك حاجات حلوة النهاردة وممكن تغير مسار حياتك لو ركزت معاها.. حاول تتصرف صح وتتكلم صح وياريت متتعمدش تسكت وتعمل فيها غامض وعميق.. ياريت يعني.

برج العذراء صحياً( نفسيا وجسمانيا وكل مايخص طاسة المزاج ):

صحتك محتاجة جبنة مقلية ف نص رغيف شامي مع فلفل اخضر وقوطة وحبة مكرونة ولحسة تونة.. ولو في دكتور دايت انتا بتتابع معاه اعترض على الكلام دة قوله عبدالله هو اللي قايلي اعمل كدة وميهمكش اي حاجة منه ولا من اي حد.. من حق الكبير يتدلع وانتا بقالك كتير لا اتهشكت ولا اتدلعت وكدة أوفر الصراحة.. اوفر اوي..

إعرف توافق برج العذراء مع باقي الأبراج النهاردة: متوافق مع الابراج الدرامية والبحرية والبرميلية والسمكمكية والنيلية والفضية والترابية..

اعرف حظك اليوم برج الميزان بالتفصيل الثلاثاء 10/4/2018 مع عبدالله أحمد برج الميزان عاطفيا( الكراش والإكس والبوي فريند والجيرل فريند والجوز والزوجة والقرايب ): متهربش من الحب وفرص الحب بحجة انك مبتحبش حد او حاجة او شعور ما يسيطر عليك ويمشيك.. انتا بتحلم بالحب لما تكون حر وبتحلم بالحرية لما تكون مستقر ف حب او على وشك الاستقرار.. إهدى كدة وريح إيقاعك حبة بليز..

برج الميزان عمليا( الشغل والمذاكرة والتخطيط لبكرة ): جمالك الآخاذ وجاذبيتك المتمكنة متآلقين بشدة وبقوة.. بس للأسف مش هينفعوك النهاردة وهتضطر تتحمل مسئولية أفعالك كلها مرة واحدة.. عموما معلش.

برج الميزان صحيا( نفسيا وجسمانيا وكل مايخص طاسة المزاج ):مبتحبش النصايح بالرغم من انك بتطلبها طول الوقت ودة بيخلق بالليل جواك قبل ماتنام كل يوم صراع مقيت.. وبتبقى محتار.. هل تسمع النصيحة اللي ف الاساسا انتا اللي كنت طالبها ولا متسمعهاش ولا تفاجئ نفسك والكل بكرة الصبح بحاجة تالتة خالص مكانتش تخطر على بال حد على الاطلاق.. كعادتك يعني.. عموما انتا حر ف نفسك بس خد بالك ان اللي بتعمله دة هو اللي بيخلق ف خيالك وحوش الاوفرثينكينج وتعالب الحزن السودة الحزينة.. مش اي حاجة تانية

إعرف توافق برج الميزان مع باقي الأبراج النهاردة: متوافق مع الابراج البرطمانية والكستبانية والبرمائية والنارية والمائية والترابية..

اعرف حظك اليوم برج العقرب بالتفصيل الثلاثاء 10/4/2018 مع عبدالله أحمد برج العقرب عاطفيا( الكراش والإكس والبوي فريند والجيرل فريند والجوز والزوجة والقرايب ): محتاج الحب ف حياتك بشكل عاجل وعارف كويس مين اللي قافل عليك حنفية الحب وف الاغلب بيتنطط معظم الوقت قدامك ومش مهتم بيك ومطنشك وانتا اوقات تحاول تلفت نظره واوقات تتضايق وتتخنق من بروده المفرط وبتستغرب ازاي بيعاملك كدة.. الحب سيادتك هو السبب.. الحب هو السر.. الحب هو الحاجة الوحيدة ف الكوكب دة اللي بتقدر تروض الوحش المتوحش اللي جواك.. مشكلتك بس انك غلاوي ف الحب.. ودة ف الاغلب اللي مخليك متطنش دلوقتي.. مش أكتر.. وجاي انا غلط برضة ف كل الكلام دة.. عادي بتحصل..

برج العقرب عملياً( الشغل والمذاكرة والتخطيط لبكرة ):

هتحتاج كل ذكائك النهاردة عشان تفلت من العكوسات ومن الفخ اللي جاي ف الطريق ليك.. إجمد كدة وواجه بشجاعة ومتخافش.

برج العقرب صحياً( نفسيا وجسمانيا وكل مايخص طاسة المزاج ):

صحتك االيومين دول بتتطلب انك تبعد عن الملح بشكل عام ودة اكي دة هيتضمن الرنجة والفسيخ والملوحة والسردين.. وخلينا صرحا مع بعض انتا مش هتعمل كدة مهما حصل وهتعاند وهتاكل الحاجات دي برضة حتى لو انتا عارف انك بعدها هتعيا.. بالتالي انا مش هاقولك متاكلهاش.. بالعكس.. انتا حر.. انتا دلوقتي كبرت خلاص وتقدر تاخد قراراتك لنفسك وتعرف تميز الصح من الغلط بسهولة.. ف براحتك.. اللي تشوفه صح.. إعمله.. وف الأخر كل واحد حر ف جسمه..

إعرف توافق برج العقرب مع باقي الأبراج النهاردة: متوافق مع الابراج الفشكولية والباراكودية والسمكمكية والهوائية.. والترابية احيانا..

اعرف حظك اليوم برج القوس بالتفصيل الثلاثاء 10/4/2018 مع عبدالله أحمد برج القوس عاطفياً( الكراش والإكس والبوي فريند والجيرل فريند والجوز والزوجة والقرايب ): حاول تتجنب المشاكل العاطفية اليومين دول عشان تعرف تواجه باقي المشاكل اللي مش عاطفية واللي بتحاوطك من كل جانب.. السند والدعم والجدعنة مطلوبين.. انما الخناق بلاش منه احسن لأنه مش هيفيد ف أي حاجة

برج القوس عملياً( الشغل والمذاكرة والتخطيط لبكرة ):

هتقول حاجات مهمة جدا النهاردة لناس كتير.. حاول تركز وانتا بتقول الحاجات دي وإعمل حسابك انك هتنساها على اخر الليل ومش هتعلق ف دماغك اساسا.

برج القوس صحياً( نفسيا وجسمانيا وكل مايخص طاسة المزاج ): صحيا انتا محتاج تاكل كويس وتنام كويس لا اكتر ولا اقل.. بجانب انك ف الاغلب الاعم محتاج تخرج لبراح واسع وتصرخ ف وش السما بالليل عشان الضغط اللي انتا حاسس بيه وخانقك دة يفك حبة او على الاقل يرخي قبضته الفولاذية المعدنية العملية ويخلي عنده دم ويراعي انك بني آدم ومش عارف تعبر عن اللي جواك بشكل سهل وخصوصا مشاعرك..

إعرف توافق برج القوس مع باقي الأبراج النهاردة: متوافق مع الابراج الحلبسية والكهربائية والبرمائية والكتكوتية والنارية والمائية..

اعرف حظك اليوم برج الجدي بالتفصيل الثلاثاء 10/4/2018 مع عبدالله أحمد برج الجدي عاطفياً( الكراش والإكس والبوي فريند والجيرل فريند والجوز والزوجة والقرايب ): محدش يقدر يسيطر عليك لأنك متمرد وغير قابل للسيطرة بس خد بالك انك بتحاول تثبت وتأكد طول الوقت على الموضوع دة عمال على بطال وبالذات ف وش اللي يحبوك ومش عاوزين منك اكتر من معاملة حلوة وكلمة تبل الريق ف رسالة ولا مكالمة تليفون مفاجئة.. امرك عجيب بصراحة!.. بتتشطر على دول منين لما انتا زي الكتكوت المبلول قدام اي حد انتا محتاجه أو عارف انه اقوى منك ويملك يأذيك.. مش عيب كدة ولا دة انتا مبتعتبروش تناقض ملفت مسف مالوش اي مبرر.. بذمتك ياشيخ عيب ولا مش عيب..

برج الجدي عملياً( الشغل والمذاكرة والتخطيط لبكرة ):

حاول تسمع النهاردة أكتر ما تتكلم وياريت تاخد بالك ان في حد معين انتا محتاج تسمعله اكتر من اي حد تاني حواليك.. ياريت تكون لماح وذكي وتاخد بالك.

برج الجدي صحياً( نفسيا وجسمانيا وكل مايخص طاسة المزاج ):

صحتك كويسة ومزاجك عالي النهاردة ان شاء الله.. ياريت بس متبتديش اليوم بخناقة او بتعليقات فيها ألش على اي حد وياريت برضة نقلل حبة من العند عشان منصدعش من كتر الجز على اسنانا.. خصوصا واحنا نايمين..

إعرف توافق برج الجدي مع باقي الأبراج النهاردة متوافق مع الابراج البرجماتية والحنكوشية والنباتية والنارية والمائية والهوائية..

اعرف حظك اليوم برج الدلو بالتفصيل الثلاثاء 10/4/2018 مع عبدالله أحمد برج الدلو عاطفياً( الكراش والإكس والبوي فريند والجيرل فريند والجوز والزوجة والقرايب ):متشغلش بالك باللي بيكتفي كل وقت بانه يظهر بس ف حياتك عشان يتطمن على المساحات اللي هو محتلها بسيف الحياء ف عقلك ووجدانك ومشاعرك.. قلبك رادرك ودليلك الصادق.. إمشي وراه وهو هيقولك تعمل ايه بالظبط الليلة

برج الدلو عملياً( الشغل والمذاكرة والتخطيط لبكرة ):

متتكلمش عن نفسك النهاردة خالص يامعلم.. وأول ماتحس انك محتاج تشرح نفسك لأي حد اسكت خالص ومتتكلمش وفكر ف اي حاجة حلوة بتحبها وبس.. مترغيش ومتريحش حد بتاتا.. سامع.. بتاتا.

برج الدلو صحياً( نفسيا وجسمانيا وكل مايخص طاسة المزاج ):

صحيا انتا ف مرحلة ممكن تتحسن فيها تماما ويمكن كمان تخف.. أو انك لا قدر الله ممكن تتنكس والحالة تزداد سوءا .. الموضوع كله واقف على اختياراتك ف الاكل وانتظامك ف مواعيد الدوا والمواظبة عليه والاهتمام ثم الاهتمام ثم الاهتمام.. غير كدة مفيش حاجة تذكر اللهم الا شوية عكوسات ممكن يوجعولك معدتك ولا حاجة.. برجاء بس تتجنب اكل الشارع من فضلك ولو سمحت.. بلاش رمرمة فارغة الله يباركلك

إعرف توافق برج الدلو مع باقي الأبراج النهاردة: متوافق مع الابراج البسكوتية والبربوشية والكتكوتية والبسبوسية والخيالية

اعرف حظك اليوم برج الحوت بالتفصيل الثلاثاء 10/4/2018 مع عبدالله أحمد

برج الحوت عاطفيا( الكراش والإكس والبوي فريند والجيرل فريند والجوز والزوجة والقرايب ):

قلبك له احتياجات مختلفة عن رغباتك الجسدية الطائشة.. حاول تفرق مابين الاتنين عشان الخلط مابين الحاجتين اخرته مش كويسة وان بدا لك الامر منطقي وعادي وكل الناس بتعمله..

برج الحوت عملياً( الشغل والمذاكرة والتخطيط لبكرة ):

محتاج تقرا كتاب حلو وتتوه معاه حبة النهاردة على الأقل لساعة زمن مش أكتر.. جايز دة يثنيك عن اتخاذ القرارات الخاطئة اللي بتفكر تاخدها ف حياتك واللي ممكن تتسبب ف خسارتك لناس كتير بتحبك.

برج الحوت صحياً( نفسيا وجسمانيا وكل مايخص طاسة المزاج ):

صحتك النهاردة محتاجة منك فيلم حلو وفشار كتير وتقفل تليفونك وتقعد تتفرج وتضحك وتستمع براحتك

إعرف توافق برج الحوت مع باقي الأبراج النهاردة:

متوافق مع الابراج الحسواكية والفرفورية والحنتوسية والبرمائية والمائية والهوائية

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.