عايز ياخد كل حقوقي.. أيمن بهجت قمر يكشف تفاصيل خلافه مع حسين الجسمي

كشف الشاعر أيمن بهجت قمر، لأول مرة تفاصيل خلافه مع الفنان الإماراتي حسين الجسمي، مؤكدًا أن الخلاف بينهم بسبب حقوق الملكية الفكرية، ولكنه لا يمانع العمل معه من جديد.

وقال أيمن بهجت قمر، في تصريحات تلفزيونية عن خلافه مع حسين الجسمي: عدينا مرحلة إننا نتخانق على التنازلات وصيغتها، لأن مفيش بينا كده إحنا إخوات ومفيش بينا شيطان، وفي بينا نجاح وكيمياء حلوة، وتفاجأت إن هو باعت صيغة تنازل ملهاش أي مبرر، كأني بديله حقوقي وحقوق ولادي وأحفادي، يعني بديله كل حاجة وكأن أنا ليس لي أي حق أدبي ولا مادي في الأغنية، وبلا مبرر.

وأضاف أيمن مهجت قمر، إنه حقق العديد من النجاحات مع الفنان حسين الجسمي، قائلًا: يعني إحنا نجحنا مع بعض من أيام، بحبك وحشتيني، لغاية بالبنط العريض، وحتة من قلبي، اللي نزلت الفترة الأخيرة، إحنا الحمد لله طول الوقت ناجحين مع بعض، والسنة دي نزلنا أغنية تتر مسلسل وسط البلد.

وأضاف: وأنا قولت له يا حسين، المنطقة بتاعت التنازلات والعقود دي بيدخل فيها الشيطان، وأنا عمري ما غدرت بيك في حاجة ولا بعتلك أي إنذار، وعمري ما طمعت فيه.

واستكمل: مفيش خلاف لي مع حسين على حاجة، ولكنه عايز ياخد كل الحقوق اللي بينص عليها قانون الملكية الفكرية، ولكن في حقوق مبنتنازلش عنها، زي حقوق الأداء العلني، وحقوق إعادة النشر، ولو الأغنية حد عايز يعملها إعلان.

وأشار إلى أنه لم يرفع قضية على الفنان حسين الجسمي، مؤكدًا أنه لن يتخذ هذا الإجراء مع أي من أصدقائه، قائلًا: مفيش قضية مرفوعة، أنا مرفعتش عليه قضية ومش هرفع على حد من صحابي قضية، هي مخاطبات وفي محاسبات نشوف أنا ليا إيه، وسايب له إيه ومخدتهوش، أنا عامل تاريخ كبير مع الجسمي، ولو مزادوش واحدة مش هتفرق، أنا عامل له أكتر من 20 أغنية وفي 15 منها مكسرة العالم.

واختتم حديثه قائلًا: لو حسين عايز يشتغل أنا موجود ولو مش عايز خلاص هو حر، ولكن أنا كوطن عربي بشتغل مع فنانين كتير كبار، ولكن حسين دخل الشيطان في العقود، ابعد عن حقوق الناس، خد حقك في الغنوة اللي أنت عاملها واتبسط، بس ابعد عن حقوق ولادي.