مِعلمينْ السيما| حمدي غيث «المعلم هُدهُد» يعطي قُبلة الحياة لأحمد زكي «أبو دبورة» في أرض الخوف (فيديو)

يبدأ موقع «السُلطة»، عرض مقتطفات حوارية من سيناريوهات الأفلام المصرية، لفنانين أتقنوا أدوار «المعلمين».

ويقدم «السُلطة» هذه الوجبة الدسمة في قسم نوستالجيا، المُخصص لشخصيات وأفلام وحكاوي وذكريات زمان، إيمانًا بأن أي شخص لا ماضي له لا حاضر له أو مستقبل.

الحلقة الأولى يعرضها موقع «السُلطة» لمقتطف حواري بين الفنانين الراحلين العظيمين، حمدي غيث وأحمد زكي (المعلم هُدهُد والضابط يحيى المنقباوي أو تاجر المخدرات يحيى أبو دبورة)، في رائعة من روائع داود عبد السيد، تأليف وإخراج، وموسيقى أكثر روعة لراجح داود..

- أنا جيت لك برجليا

وأنا مبسوط إنك جيت.. كنت خايف إنك تموت قابل ما أقابلك..لأني عايز أعرف منك حاجة.. أنت اللي قتلت رجب أبو حسين وإبراهيم الحوت؟

- أيوة..

غبي غبي.. غبي، أول مرة قابلنا رجب أبو حسين لما جابه إبراهيم الحوت، خاطر خلالني أبص لك، لاقيت شيء غريب.. لاقيتك بتكرهه بتكرهه كره البني آدم للموت.. بس الإنسان بيكره الموت ويخاف منه لكن بيحترمه، إنما أنت بتكره رجب وبتحتقره.

اندهشت، قلت الواد ده فيه شيء غريب.. ابتديت اهتم بيك وأراقب وشك.

قلت الواد أبو دبورة ده بير غويط مش سهل، فاهم كل حاجة، والفرق بيني وبينك؛ إن أيامي وسنيني حمول شايلها، يعني ما قدرش أروح لهم وأشتغل معاهم، إنما أنت شاب خفيف مش شايل اللي أنا شايله، وأنت عملت اللي أنا كان ممكن أعمله وأنا في سنك.. بس أنت طلعت غبي وأنا طلعت عديم الفراسة.

- إيه العلاقة بين ده واللي بيحصل دلوقتي؟

ليك حق تسأل.. يا أبو دبوردة قتل رجب وإبراهيم هو الأصل، هو اللي خلاك ما تسواش غير تمن رصاصة في دماغك.. دول نظام، مش على قد مصر، على قد العالم كله، والكبار مش إحنا، دول برانا، هما اللي بيزرعوا، يحصدوا، يصنعوا، ويهربوا، وإحنا اللي بنوزع.

ورجب وإبراهيم هما «التوكيل» لو ماتوا يجي غيرهم لكن لو اتقتلوا اللي قتلهم لازم يدفع غلطته.

عشان كدة لما قالولي إنك أنت قتلتهم ما صدقتش.. لأن كنت فاكرك معلم، وده مش شغل معلمين، مش شغل معلمين يااااا أبو دبورة.

- بس أنا ما بلغتش عن حد وما بشتغلش لحساب البوليس.!

البوليس عاوز رقبتنا.. واحنا بنكرهه، بس دا ما يمنعش إننا نفهم بعض، وحكاية إنك أنت بتشتغل معاهم دي لعبة مكشوفة، بس أي معلم لازم يفهم الرسالة.

- رسالة إيه؟

الرسالة من بعيد.. من فوق، الرسالة إنهم مش هيرتاحوا إلا إذا أبو دبورة اتمسح مات، يعني أنت لازم تموت عشان إحنا نعيش، وده مالوش دعوة بالعواطف بس أنا مش هقتلك، مش عارف ليه يمكن لأني مش معصوم من الغلط، ربنا سبحانه وتعالى هو وحده اللي معصوم، وغلطتي إني حبيتك، نصيحة يا أبو دبورة سيب مصر واهرب ماحدش هيرحمك، وأنا لو شفت وشك تاني هقتلك.